ଭଗବାନ ଗଣେଶଙ୍କ ପାଖରେ କାହିଁକି ଲାଗି ହୁଏନି ତୁଳସୀ?

ଭୁବନେଶ୍ୱର :  ତୁଳସୀ ଭଗବାନ ବିଷ୍ଣୁଙ୍କ ଅତ୍ୟନ୍ତ ପ୍ରିୟ । ଏତେ ପ୍ରିୟ ଯେ, ଭଗବାନ ବିଷ୍ଣୁଙ୍କ ଏକ ସ୍ୱରୂପ ସାଳଗ୍ରାମର ବିବାହ ତୁଳସୀ ସହିତ ହୋଇଛି  । ଯେଉଁଠି ଭଗବାନ ଗଣେଶଙ୍କ ପୂଜାରେ ତୁଳସୀକୁ ସମ୍ପୂର୍ଣ୍ଣ ରୂପେ ବର୍ଜନ କରାଯାଇଛି  । ତେବେ ଏପରି କ’ଣ ପାଇଁ ତାହା ଜାଣିବା  ।

ପୌରାଣିକ କଥା ଅନୁଯାୟୀ, ଏକଦା ଶ୍ରୀଗଣେଶ ଗଙ୍ଗା ନଦୀ ତଟରେ ତପସ୍ୟା କରୁଥିଲେ  । ଏହି ସମୟରେ କନ୍ୟା ତୁଳସୀ ବିବାହର ଇଚ୍ଛା ନେଇ ତୀର୍ଥ ଯାତ୍ରାରେ ବାହାରିଥିଲେ  । ଦେବୀ ତୁଳସୀ ସମସ୍ତ ତୀର୍ଥ ସ୍ଥଳ ଭ୍ରମଣ କରି ଗଙ୍ଗା ତଟରେ ପହଞ୍ଚôଲେ  । ଗଙ୍ଗା ତଟରେ ଦେବୀ ତୁଳସୀ ଯୁବକ ଗଣେଶଙ୍କୁ ଦେଖିଲେ ଯିଏ ତପସ୍ୟାରେ ମଗ୍ନ ଥିଲେ  । ଶାସ୍ତ୍ର ଅନୁସାରେ ତପସ୍ୟା ସମୟରେ ଗଣେଶ ରତ୍ନଜଡ଼ିତ ସିଂହାସନ ଉପରେ ବସିଥିଲେ  । ତାଙ୍କ ସମ୍ପୂର୍ଣ୍ଣ ଶରୀରରେ ଚନ୍ଦନ ଲେପା ଯାଇଥିଲା  । ବେକରେ ପୁଷ୍ପମାଳା ସହିତ ସ୍ୱର୍ଣ୍ଣ ମଣି ଖଚିତ ରତ୍ନର ଅନେକ ହାର ପିନ୍ଧିଥିଲେ  । ଅଣ୍ଟାରେ ଅତ୍ୟନ୍ତ କୋମଳ ରେସମ ପିତାମ୍ବର ପିନ୍ଧିଥିଲେ  । ତୁଳସୀ ଶ୍ରୀଗଣେଶଙ୍କ ଏପରି ରୂପରେ ମୋହିତ ହୋଇଗଲେ  । ନିଜ ମନରେ ଗଣେଶଙ୍କୁ ବିବାହ କରିବାର ଇଚ୍ଛା ସୃଷ୍ଟି କରି ତାଙ୍କ ତପସ୍ୟାକୁ ଭଗ୍ନ କରିଦେଲେ  । ଗଣେଶ ତୁଳସୀର ମନର ଇଚ୍ଛାକୁ ଜାଣି ନିଜକୁ ବ୍ରହ୍ମଚାରୀ କହି ବିବାହର ପ୍ରସ୍ତାବକୁ ମନା କରିଦେଲେ  ।

ଶ୍ରୀ ଗଣେଶଙ୍କ ଦ୍ୱାରା ନିଜର ବିବାହ ପ୍ରସ୍ତାବକୁ ମନା କରିବା ଶୁଣି ଦେବୀ ତୁଳସୀ ରାଗିଯାଇ ତାଙ୍କର ଦୁଇଟି ବିବାହ ହେବ ବୋଲି ଅଭିଶାପ ଦେଲେ  । ଏଥିରେ ଶ୍ରୀ ଗଣେଶ ରାଗିଯାଇ ତୁଳସୀଙ୍କ ବିବାହ ଏକ ରାକ୍ଷସଙ୍କ ସହିତ ହେବ ବୋଲି ଅଭିଶାପ ଦେଇଥିଲେ  । ଜଣେ ରାକ୍ଷସର ପତ୍ନୀ ହେବା କଥା ଜାଣି ତୁଳସୀ ପ୍ରଭୁ ଗଣେଶଙ୍କୁ କ୍ଷମା ପ୍ରାର୍ଥନା କଲେ  । ଗଣେଶ କହିଲେ ତୁମର ବିବାହ ଶଙ୍ଖଚୁଡ଼ ରାକ୍ଷସ ସହିତ ହେବ  । କିନ୍ତୁ ପରେ ତମେ ଗୋଟିଏ ଗଛର ରୂପ ଧାରଣ କରିବ ଓ ଭଗବାନ ବିଷ୍ଣୁଙ୍କ ଅତି ପ୍ରିୟ ରହିବ  । କଳିଯୁଗରେ ଜୀବନ ଓ ମୋକ୍ଷ ପ୍ରଦାନ କରିବ  । କିନ୍ତୁ ମୋ ପୂଜାରେ ତୁମର ପ୍ରୟୋଗ ସେତେବେଳେ ବି କରାଯିବ ନାହିଁ  । ମୋ ପୂଜାରେ ତୁଳସୀ ଅର୍ପଣ କରିବା ଶୁଭ ହେବ ନାହିଁ  । ସେହିଦିନରୁ ଗଣେଶ ପୂଜାରେ ତୁଳସୀକୁ ବର୍ଜନ କରାଯାଇଛି  ।