ଉଦ୍ଧବଙ୍କୁ ମିଳିଲା ମଶାଲ ଚିହ୍ନ

ମୁମ୍ବାଇ:ବହୁଦିନର ବିବାଦର ଅନ୍ତ ଘଟିଛି । ଉଦ୍ଧବଙ୍କ ଗୋଷ୍ଠୀ ଦଳର ନାମ ଶିବସେନା (ଉଦ୍ଧବ ବାଲାସାହବେ ଠାକ୍‌ରେ) ଏବଂ ଏକନାଥ ସିନ୍ଦେଙ୍କ ଗୋଷ୍ଠୀ ଦଳର ନାମ ବାଲାସାହେବାଞ୍ଚି ଶିବସେନା ରଖାଯାଇଛି। ଏହି ଦୁଇନାମକୁ ନିର୍ବାଚନ କମିସନ ସ୍ବୀକୃତି ଦେଇଛନ୍ତି। ଫଳରେ ଏମାନେ ଉପରୋକ୍ତ ନାମରେ ପରିଚିତ ହେବେ। ଉଦ୍ଧବ ଦଳକୁ ନିର୍ବାଚନୀ ଚିହ୍ନ ଭାବେ ‘ଜ୍ୱଳନ୍ତ ମଶାଲ’ ବଣ୍ଟନ କରାଯାଇଛି। ଏହାକୁ ନେଇ ନିର୍ବାଚନ କମିଶନ କହିଛନ୍ତି ଯେ ପୂର୍ବରୁ ଜ୍ୱଳନ୍ତ ମଶାଲ ସମତା ପାର୍ଟିକୁ ପ୍ରଦାନ କରାଯାଇଥିଲା, କିନ୍ତୁ ୨୦୦୪ ମସିହାରେ ଏହି ମାନ୍ୟତାକୁ ରଦ୍ଦ କରିଦିଆଯାଇଥିଲା | ତେବେ ଶିବସେନାର ଜ୍ୱଳନ୍ତ ମଶାଲ ପ୍ରତୀକ ସହିତ ଏକ ଦୀର୍ଘ ଇତିହାସ ରହିଛି।

୧୯୮୫ ମସିହାରେ ଶିବସେନା ଏହି ଚିହ୍ନ ସାହାଯ୍ୟରେ ନିର୍ବାଚନ ଜିତିଥିଲା | ସେହି ସମୟରେ ଶିବସେନା ପାଖରେ ପ୍ରତୀକ ନଥିଲା | ସପ୍ତମ ମହାରାଷ୍ଟ୍ର ବିଧାନସଭାରେ ଶିବସେନାର ଏକମାତ୍ର ବିଧାୟକ ଛଗନ୍ ଭୁଜବଲ ମଝଗାଓଁ ନିର୍ବାଚନମଣ୍ଡଳୀରୁ ଜ୍ୱଳନ୍ତ ମଶାଲ ପ୍ରତୀକରେ ନିର୍ବାଚନ ଜିତିଥିଲେ। ବର୍ତ୍ତମାନ ଏନସିପିର ବରିଷ୍ଠ ନେତା ଥିବା ଛଗନ୍ ଭୁଜବଲ କହିଛନ୍ତି ଯେ, “ମୁଁ ଜ୍ୱଳନ୍ତ ମଶାଲକୁ ବାଛିଥିଲି, କାରଣ ଏହା ବିପ୍ଳବର ପ୍ରତୀକ ଥିଲା ଏବଂ ଏହା ମହାରାଷ୍ଟ୍ରବାସୀଙ୍କୁ ପାଇଁ ଏକ ନୂତନ ରାସ୍ତା ଦେଖାଇଥିଲା।”

୧୯୮୫ ନିର୍ବାଚନକୁ ସ୍ମରଣ କରି ଭୁଜବଲ କହିଛନ୍ତି ଯେ ସେତେବେଳେ ନିର୍ବାଚନ ପ୍ରଚାର ପାଇଁ ମୁଖ୍ୟତଃ କାନ୍ଥରେ ଚିତ୍ର କରାଯାଉଥିଲା | ଆଉ ମଶାଲ ଚିତ୍ର ତିଆରି କରିବା ମଧ୍ୟ ସହଜ ଥିଲା। ସେ କହିଛନ୍ତି, “ତା’ପରେ ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିବାକୁ ଆମ ପାଖରେ ଟଙ୍କା ନଥିଲା, ତେଣୁ ମୁଁ କାନ୍ଥରେ ମଶାଲ ଚିତ୍ର ମଧ୍ୟ କରୁଥିଲି। ମୋର ଅଭିଯାନ ସମୟରେ ଏହା ଭୋଟରଙ୍କୁ ଆକର୍ଷିତ କରିଥିଲା ।