ତମନ୍ନାଙ୍କ ମନପସନ୍ଦ ଭୂମିକା

ଦକ୍ଷିଣ ସିନେଜଗତ ସୁପରଷ୍ଟାର ହେଉଛନ୍ତି ତମନ୍ନା ଭାଟିଆ । ତମନ୍ନା ଏବେ ବଲିଉଡ଼ରେ ତିଷ୍ଠିବାକୁ ପ୍ରାଣପଣେ ଚେଷ୍ଟା କରୁଛନ୍ତି । ୨୦୧୩ରେ ପ୍ରଥମଥର ‘ହିମ୍ମତୱାଲା’ରେ ତାଙ୍କୁ ସୁଯୋଗ ମିଳିଲା । ହିନ୍ଦୀ ସିନେଜଗତରେ ପ୍ରବେଶ ପାଇଁ ତମନ୍ନାଙ୍କୁ ରାସ୍ତା ମିଳିଗଲା । ହେଲେ ଏହି ଚଳଚିତ୍ର ପରେ ସଙ୍ଗେସଙ୍ଗେ ସୁଯୋଗ ମିଳିଲାନି । ଭଲଭଲ ବ୍ୟାନରରେ କାମ କରିବାକୁ ତାଙ୍କ ଭଳି ହିଟ ଦକ୍ଷିଣ ଜଗତ ଅଭିନେତ୍ରୀ ଅଡ଼ିସନ ଦେବାକୁ ବାଧ୍ୟ ହେଲେ ।

୨୦୧୪ରେ ‘ଏଣ୍ଟରଟେନମେଣ୍ଟ’ଚଳଚ୍ଚିତ୍ରରେ କାମ କରିବା ପରେ ତାଙ୍କୁ ଆଉ ଭଲ ଅଫର ମିଳିଲାନି । ୨୦୧୯ରେ ତମନ୍ନାଙ୍କ ହାତକୁ ‘ବବଲି ବାଉନସର’ ଚଳଚ୍ଚିତ୍ର ଆସିଲା । ହେଲେ କରୋନା କାରଣରୁ ଏହି ଚଳଚ୍ଚିତ୍ର ସୁଟିଂ ଆଗେଇପାରିଲାନି ।

୨୦୨୧ ଜୁନରେ ସୁଟିଂ ଆରମ୍ଭ ହୋଇ ସେହି ବର୍ଷ ଶେଷ ମଧ୍ୟ ହେଲା । ବାଉନ୍ସର ଭୂମିକାରେ ସେ ଏହି ଚଳଚ୍ଚିତ୍ରରେ କାମ କରିଛନ୍ତି । ବହୁ ବର୍ଷ ପ୍ରତୀକ୍ଷା ପରେ ନିଜ ମନପସନ୍ଦର ଭୂମିକାଟେ ପାଇଥିବାର କହିଛନ୍ତି ତମନ୍ନା । ଦେଖାଯାଉ, ପ୍ରଶଂସକ ତାଙ୍କୁ ଏହି ଚରିତ୍ରରେ ପସନ୍ଦ କରୁଛନ୍ତି କି ନାହିଁ ।