ପି -୨୦ ସମ୍ମିଳନୀରେ ଯୋଗ ଦେବେ ମୋଦି

ନୂଆଦିଲ୍ଲୀ: ଜି-୨୦ ଶିଖର ସମ୍ମିଳନୀକୁ ସଫଳତାର ସହ ଅୟୋଜନ କରିବା ପରେ ଭାରତ ଏହି କ୍ରମରେ ଅନ୍ୟ ଏକ ଉପଲବ୍ଧି ହାସଲ କରିବାକୁ ଯାଉଛି । ରାଜଧାନୀ ଦିଲ୍ଲୀରେ ପି-୨୦ ସମ୍ମିଳନୀ ଅୟୋଜିତ ହେଉଛି । ଏହି ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭାଗ ନେବେ । ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ଦ୍ୱାରା ମିଳୁଥିବା ସୂଚନା ଅନୁଯାୟୀ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀର ଯଶୋଭୂମୀ ଠାରେ ଜି-୨୦ ଦେଶର ସଂସଦୀୟ ଅଧ୍ୟକ୍ଷଙ୍କ ବୈଠକ ପି-୨୦କୁ ସମ୍ବୋଧିତ କରିବେ ।

ଭାରତର ଜି-୨୦ ଅଧ୍ୟକ୍ଷତାଙ୍କ ବିଷୟବସ୍ତୁ ଏବଂ ୯ମ ପି-୨୦ ସମ୍ମିଳନୀର ବିଷୟବସ୍ତୁ ହେଉଛି – ଗୋଟିଏ ପୃଥିବୀ, ଗୋଟିଏ ପରିବାର, ଗୋଟିଏ ଭବିଷ୍ୟତ ପାଇଁ ସଂସଦ। ଏହି ଦୁଇ ଦିନିଆ ବିଶ୍ୱସ୍ତରୀୟ କାର୍ଯ୍ୟକ୍ରମରେ ୨୫ ବକ୍ତା, ୧୦ ଡେପୁଟି ସ୍ପିକର ଏବଂ ସଦସ୍ୟ ଦେଶର ସଂସଦର ୫୦ ସଦସ୍ୟ ଅଂଶଗ୍ରହଣ କରିବେ। ଆଫ୍ରିକୀୟ ସଂସଦର ପ୍ରତିନିଧିମାନେ ମଧ୍ୟ ପ୍ରଥମ ଥର ପାଇଁ ଭାରତରେ ହେବାକୁ ଥିବା ପି-୨୦ କାର୍ଯ୍ୟକ୍ରମରେ ଅଂଶଗ୍ରହଣ କରିବେ। କହିବାକୁ ଗଲେ ପି-୨୦ ସମ୍ମିଳନୀ ପୂର୍ବରୁ ଗତକାଲି ଯଶଭୂମିରେ ପରିବେଶ ଅନୁକୂଳ ଜୀବନଶୈଳୀ ଉପରେ ସଂସଦୀୟ ଫୋରମର ଏକ ବୈଠକ ଅନୁଷ୍ଠିତ ହୋଇଥିଲା। ଏହି ସଭାରେ ଲୋକସଭା ବାଚସ୍ପତି ଓମ ବିର୍ଲା କହିଛନ୍ତି ଯେ, ଜଳବାୟୁ ପରିବର୍ତ୍ତନ ଏବଂ ଏହାର ପ୍ରଭାବ ମାନବଜାତିର ସାଧାରଣ ଭବିଷ୍ୟତ ସହିତ ଜଡିତ।

ସେ ପୁଣି କହିଛନ୍ତି ଯେ, ଭାରତର ପଦକ୍ଷେପ ଅନୁଯାୟୀ ପରିବେଶ ସମ୍ବନ୍ଧୀୟ ପ୍ରସଙ୍ଗଗୁଡ଼ିକ ସର୍ବସମ୍ମତି କ୍ରମେ ମୁଖ୍ୟ ଅଲୋଚନା ପାଇଁ ରଖାଯାଇଛି । ଲୋକସଭା ବାଚସ୍ପତି ଓମ ବିର୍ଲା କହିଛନ୍ତି ଯେ, ପରିବେଶ ସୁରକ୍ଷା ପାଇଁ ମିଶନ ଜୀବନଶୈଳୀ ହେଉଛି ସମୟର ଆବଶ୍ୟକତା । ସମସାମୟିକ ଆହ୍ୱାନର ମୁକାବିଲା ପାଇଁ ଏହି ମିଶନ ବିଶ୍ୱକୁ ନୂତନ ଦିଗ ଦେଖାଇଛି । ବ୍ୟକ୍ତିଗତ ଦାୟିତ୍ୱ ଉପରେ ଜୋର ଦେଇ ସେ କହିଛନ୍ତି ଯେ, କେବଳ ନୀତି ଏବଂ ଆଇନ କାନୁନ ଜଳବାୟୁ ପରିବର୍ତ୍ତନର ସମସ୍ୟା ସହ ଲଢିବା ପାଇଁ ପର୍ଯ୍ୟାପ୍ତ ନୁହେଁ । ଏଥିପାଇଁ ପ୍ରତ୍ୟେକ ବ୍ୟକ୍ତିକୁ ନିଜ ଦୈନିକ ଜୀବନରେ ପରିବର୍ତ୍ତନ ଆଣି ଦେଶରେ ସାମୂହିକ ଯୋଗଦାନ କରିବାକୁ ପଡିବ ।