ସମୁଦ୍ରରେ ଲୀନ ହେବ ମେରାଇନ ଡ଼୍ରାଇଭ

ପୁରୀ: ଦିନରାତି ଅବାଧ ବାଲିଚୋରି ଯୋଗୁଁ ପୁରୀ-କୋଣାର୍କ ବେଳାଭୂମି ମାର୍ଗ ବା ମେରାଇନ ଡ଼୍ରାଇଭ ସମୁଦ୍ରରେ ଲୀନ ହେବାକୁ ଯାଉଛି । ସମ୍ପ୍ରତି ରାମଚଣ୍ଡୀ ନିକଟସ୍ଥ ଇକୋ-ରିଟ୍ରିଟ ବେଳାଭୂମି ମାର୍ଗ ଦ୍ରୁତ ଅବକ୍ଷୟ ହେବାରେ ଲାଗିଛି । ସୀମା ଅତିକ୍ରମ କରି ଆଗକୁ ମାଡ଼ି ଆସୁଛି ବଡ଼ ବଡ଼ ସମୁଦ୍ର ଜୁଆର । ବାଲି ଅତଡ଼ା ଖସିବା ଯୋଗୁଁ ବେଳାଭୂମି ମାର୍ଗର ସ୍ଥାୟୀତ୍ୱ ପ୍ରତି ବିପଦ ଦେଖା ଦେଇଛି ।

ସମୁଦ୍ର ବେଳାଭୂମିରେ ଥିବା ବାଲୁକାସ୍ତୁପଗୁଡ଼ିକୁ କେତେକ ଠିକାଦାର ଏବଂ ଟ୍ରାକ୍ଟର ମାଲିକ ଭାଙ୍ଗି ନିଶ୍ଚିହ୍ନ କରି ଦେଇଛନ୍ତି । ସମୁଦ୍ର ଏବଂ ବେଳାମାର୍ଗ ମଧ୍ୟରେ ରହିଥିବା ପ୍ରାକୃତିକ ପ୍ରାଚୀର ଭାଙ୍ଗି ଦିଆଯିବା ଯୋଗୁଁ ମାଡ଼ି ଆସୁଛି ଜୁଆର । ଏହା ସହିତ ସ୍ପଷ୍ଟ ଦିବାଲୋକରେ ପୁରୀ-କୋଣାର୍କ ବେଳାଭୂମିରୁ ନିୟମିତ ବାଲି ଚୋରି କରାଯାଉଛି ।

ସ୍ଥିତି ବିଗିଡ଼ିବାପରେ ରାଜ୍ୟ ସରକାରଙ୍କୁ ଏବେ ବେଳାଭୂମି ମାର୍ଗ ସୁରକ୍ଷା ଚିନ୍ତା ଘାରିଛି । ଏଥିପାଇଁ ଅବକ୍ଷୟ ହେଉଥିବା ସ୍ଥାନରେ କଂକ୍ରିଟ ପ୍ରାଚୀର ନିର୍ମାଣ ସମେତ ସ୍ଥାୟୀ ପ୍ରତିକାର ବ୍ୟବସ୍ଥା ନିମନ୍ତେ ଲୋକେ ଦାବି କରିଛନ୍ତି ।