ଏକାକୀ ଜାତୀୟ ନିର୍ବାଚନ ଲଢ଼ିବେ ଦିଦି

କୋଲ୍‌କାତା: ଜନସାଧାରଣଙ୍କ ସମର୍ଥନରେ ‘ତୃଣମୂଳ କଂ‌ଗ୍ରେସ’ ଆସନ୍ତାବର୍ଷ ଏକାକୀ ଜାତୀୟ ନିର୍ବାଚନରେ ପ୍ରତିଦ୍ବନ୍ଦ୍ବିତା କରିବ ବୋଲି ଗୁରୁବାର ଦିନ ଦଳର ମୁଖ୍ୟ ତଥା ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଘୋଷଣା କରିଛନ୍ତି।

‘ବିଜେପି’ ସହିତ ବୁଝାମଣା କରିଛନ୍ତି ବୋଲି ‘ସିପିଏମ୍‌’ ଓ ‘କଂ‌ଗ୍ରେସ’କୁ ଦୋଷ ଦେଇ ସ‌େ କହିଛନ୍ତି, ମେଣ୍ଟରେ ପରସ୍ପରକୁ ବିରୋଧ କରୁଥିବା ଦଳ ମେଣ୍ଟ କଲେ କଂଗ୍ରେସ ‘ବିଜେପି’ ସହିତ ଲଢ଼ିବ କେମିତି? ବାମଦଳ ମଧ୍ୟ କେମିତି ‘ବିଜେପି’ ସହିତ ଲଢ଼ିବ? ‘ବିଜେପି’ ବିରୋଧୀ ବୋଲି ‘ସିପିଏମ୍‌’ ଓ କଂଗ୍ରେସ କହୁଛନ୍ତି କେମିତି?

ପଶ୍ଚିମବଙ୍ଗର ସାର୍‌ଦିଘି ଉପନିର୍ବାଚନ ଦୃଷ୍ଟାନ୍ତ ଦେଇ ମୁଖ୍ୟମନ୍ତ୍ରୀ ବାନାର୍ଜୀ ଉପରୋକ୍ତ କଥା କହିଛନ୍ତି। ଉକ୍ତ ବିଧାନସଭା ଆସନକୁ କଂଗ୍ରେସ ଶାସକ ‘ତୃଣମୂଳ କଂଗ୍ରେସ’ଠାରୁ ବଳପୂର୍ବକ ଛଡ଼ାଇ ନେଇଛି।

ବାନାର୍ଜୀ କହିଛନ୍ତି, ସାର୍‌ଦିଘିରେ କଂଗ୍ରେସ, ବାମ ଓ ‘ବ‌ିଜେପି’ ‘ସାମ୍ପ୍ରଦାୟିକ କାର୍ଡ’ ଖେଳିଛନ୍ତି। ଫରକ ଏତିକି ଯେ, ‘ବିଜେପି’ ଏହି କାର୍ଡ ଖୋଲାଖୋଲି ଖେଳିଥିବା ବେଳେ ‘ସିପିଏମ୍‌’ ଓ କଂଗ୍ରେସ ଗୁପ୍ତରେ ଖେଳିଛନ୍ତି। ତେଣୁ, ଆମେ ‘ସିପିଏମ୍‌’ ଓ କଂଗ୍ରେସ ବୁଦ୍ଧିରେ ପଡ଼ିବୁ ନାହିଁ। ଯେଉଁମାନେ ‘ବିଜେପି’ ସହିତ ମିଶି କାମ କରନ୍ତି, ଆମେ ସେମାନଙ୍କ ସହିତ ମେଣ୍ଟ କରିପାରିବୁ ନାହିଁ।

Comments are closed.