ପୁଣି ବିମାନରେ ନିଆଁ, ଦୁର୍ଘଟଣାରୁ ଅଳ୍ପକେ ରକ୍ଷା

ନୂଆଦିଲ୍ଲୀ : ଇଣ୍ଡିଗୋର ଦିଲ୍ଲୀ-ବେଙ୍ଗାଲୁରୁ ଫ୍ଲାଇଟ୍‌ ଇଂଜିନରେ ଶୁକ୍ରବାର ଦିନ ଉଡ଼ାଣ ଆରମ୍ଭ ସମୟରେ ନିଆଁ ଲାଗିଥିବା ଦେଖିବାକୁ ମିଳିଥିଲା‌। ଦିଲ୍ଲୀ ବିମାନ ବନ୍ଦରରୁ ବିମାନଟି ଉଡ଼ାଣ ଆରମ୍ଭ କରିବା ମାତ୍ରେ ଇଂଜିନରେ ନିଆଁ ଝୁଲ ଦେଖିବାକୁ ମିଳବାରୁ ଏହାକୁ ତୁରନ୍ତ ନିୟନ୍ତ୍ରଣ କରି ଅଟକାଇ ଦିଆଯାଇଥିଲା। ବିମାନ ବନ୍ଦରରେ ପୂର୍ଣ୍ଣ ଜରୁରୀ ପରିସ୍ଥିତି ଘୋଷଣା ସହ ଯାତ୍ରୀମାନଙ୍କୁ ସୁରକ୍ଷିତ ବାହାର କରାଯାଇଥିଲା। ଏହି ଘଟଣାରେ କେହି ହତାହତ ହୋଇଥିବା ସୂଚନା ନାହିଁ।

ଇଣ୍ଡିଗୋ ବିମାନ ୬ଇ-୨୧୩୧ର ଇଂଜିନରେ ନିଆଁ ଲାଗିବା ଦେଖି ଯାତ୍ରୀମାନେ ଆତଙ୍କିତ ହୋଇପଡ଼ିଥିଲୋ। ପ୍ରିୟଙ୍କା କୁମାର ନାମ୍ନୀ ଜଣେ ମହିଳା ବିମାନରେ ନିଆଁ ଲାଗିଥିବା ଭିଡିଓ ସେୟାର କରିଛନ୍ତି। ଟ୍ବିଟର୍‌ରେ ଭିଡିଓ ପୋଷ୍ଟ କରି ସେ ଲେଖିଛନ୍ତି ଯେ ଉଡ଼ାଣର ଭିଡିଓ ରେକର୍ଡିଂ କରିବାକୁ ସେ ଚାହୁଥିଲେ ଏବଂ ଇଂଜିନରେ ନିଆଁ ଲାଗିଯାଇଥିବା ଦେଖିବାକୁ ମିଳିଥିଲା। ଏହି ଘଟଣାର ବିସ୍ତୃତ ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଛି ଏବଂ ଡିଜିସିଏ ଇଣ୍ଡିଗୋକୁ ଏ ନେଇ କୈଫିୟତ ତଲବ କରିଛି।

ସୂଚନାଯୋଗ୍ୟ, ଚଳିତ ବର୍ଷ ଜୁନ୍‌ ୧୯ ତାରିଖରେ ପାଟନାରୁ ଦିଲ୍ଲୀ ଯାଉଥିବା ସ୍ପାଇସ୍‌ଜେଟ୍‌ର ଏକ ବିମାନରେ ଉଡ଼ାଣ ଆରମ୍ଭର କିଛି ସମୟ ପରେ ନିଆଁ ଲାଗିଯାଇଥିଲା। ଏହାପରେ ବିମାନକୁ ଜରୁରୀ ସ୍ଥିତିରେ ପାଟନା ବିମାନ ବନ୍ଦରରେ ଅବତରଣ କରାଯାଇଥିଲା।