ପବିତ୍ର ସଂପର୍କରେ ଲାଗିଲା କଳାଦାଗ, ସ୍ୱାମୀ ବିକିଦେଲା ସ୍ତ୍ରୀର କିଡନୀ

ମାଲକାନଗିରି: କୁହାଯାଏ, ସ୍ୱାମୀ-ସ୍ତ୍ରୀର ସଂପର୍କରେ ଥାଏ ପବିତ୍ରତା ଓ ଭଲପାଇବା । ଉଭୟ ଉଭୟଙ୍କ ଉପରେ ଭରଷା ଓ ବିଶ୍ୱାସ ରହିବା ନିତ୍ୟାନ୍ତ ଆବଶ୍ୟକ ହୋଇପଡେ଼ । କିନ୍ତୁ ଆଜିକା ସମାଜ ଆଗରେ ସ୍ୱାମୀ, ସ୍ତ୍ରୀର ସଂପର୍କ ଉପରେ କଳା ଦାଗ ଲଗାଇଛି ଏହି ଘଟଣା ।

ଟଙ୍କା ଲୋଭରେ ଚିକିତ୍ସାର ବାହାନା କରି ଜଣେ ସ୍ୱାମୀ ନିଜ ସ୍ତ୍ରୀଙ୍କ କିଡ଼ନୀ ବିକିଦେବା ନେଇ ଅଭିଯୋଗ ହୋଇଛି । ସ୍ୱାମୀ ଚିକିତ୍ସା କରିବା କହି ଭୁବନେଶ୍ୱରର ଏକ ଘରୋଇ ହସ୍ପିଟାଲକୁ ଡ଼ାକିନେଇ ନିଜ ସ୍ତ୍ରୀର ଗୋଟିଏ କିଡ଼ନୀ ବିକ୍ରି କରିଦେଇଛି । ଯାହା ଏବେ ଚର୍ଚ୍ଚର ବିଷୟ ସାଜିଛି । ଏକ ଘରୋଇ ହସ୍ପିଟାଲରେ ନିଶ୍ଚେତକ ଇଞ୍ଜେକସନ ଦେଇ ଅଚେତ କରାଇବା ପରେ କିଡ଼ନୀ ବିକ୍ରି କରିଦେଲା ସ୍ୱାମୀ । ପେଟରେ ଯନ୍ତ୍ରଣା ହେବାରୁ ପରୀକ୍ଷା କରିବା ପରେ କିଡ଼ନୀ ନଥିବା ଜଣାପଡ଼ିଛି । ଦୀର୍ଘ ୪ବର୍ଷ ପରେ ଏହି ଘଟଣା ପଦାକୁ ଆସିଛି ।

ଏନେଇ ମାଲକାନାଗିରି ଥାନାରେ ଆଜି ସ୍ୱାମୀଙ୍କ ନାଁରେ ସାଂଘାତିକ ଅଭିଯୋଗ ଆଣିଛନ୍ତି ପୀଡ଼ିତା । ମାଲକାନାଗିରି ବ୍ଲକ୍‌ କତାମେଟା ଗାଁର ଏହି ଘଟଣା ଏବେ ହଇଚଇ ସୃଷ୍ଟି କରିଛି । ଅଭିଯୋଗ ପରେ ପୁଲିସ ତଦନ୍ତ ଆରମ୍ଭ କରିଛି । ଗୁରୁତ୍ୱପୂର୍ଣ୍ଣ ବିଷୟ ହେଉଛି, ଇତିମଧ୍ୟରେ ଅଭିଯୁକ୍ତ ସ୍ୱାମୀ ପ୍ରଶାନ୍ତ କୁଣ୍ଡୁ ଅନ୍ୟ ଜଣେ ଯୁବତୀଙ୍କୁ ଧରି ଫେରାର ମାରିଛନ୍ତି । ଯିବା ପୂର୍ବରୁ କୌଶଳ କରି ପତ୍ନୀ ରଞ୍ଜିତାଙ୍କୁ ବାପ ଘରକୁ ବିଦା କରିଦେଇଛନ୍ତି ।

ରଞ୍ଜିତାଙ୍କ ଅଭିଯୋଗ ଅନୁସାରେ, ପ୍ରଶାନ୍ତଙ୍କ ଘର ବାଂଲାଦେଶରେ । ସେ ଅନୁପ୍ରବେଶକାରୀ ଭାବେ ଆସିବା ପରେ କତାମେଟା ଗ୍ରାମରେ ରହୁଥିଲେ । ୧୨ ବର୍ଷ ପୂର୍ବେ ସେ ରଞ୍ଜିତାଙ୍କୁ ପ୍ରେମ ବିବାହ କରିଥିଲେ ଉଭୟଙ୍କର ଦୁଇଟି ସନ୍ତାନ ମଧ୍ୟ ଅଛନ୍ତି । କାମ କରୁଥିବା ସମୟରେ ବାରମ୍ବାର ପେଟରେ ଯନ୍ତ୍ରଣା ହେବାରୁ ରଞ୍ଜିତା ଡ଼ାକ୍ତରଖାନା ଯାଇ ପରୀକ୍ଷା କରିବାପରେ ତାଙ୍କର ଗୋଟିଏ କିଡନୀ ନଥିବା ସେ ଜାଣିବାକୁ ପାଇଥିଲେ । ଏହାପରେ ସେ ମାଲକାନଗିରି ଥାନାରେ ଅଭିଯୋଗ କରିଛନ୍ତି ।