ମଧୁସୂଦନ ଦାସଙ୍କୁ ମିଳୁ ଭାରତରତ୍ନ
ଭୁବନେଶ୍ବର : ଓଡ଼ିଶା ମାଟିର ସର୍ବଶ୍ରେଷ୍ଠ ବ୍ୟକ୍ତିତ୍ବ ମଧୁସୂଦନ ଦାସ ମରଣୋତ୍ତର ‘ଭାରତରତ୍ନ’ ପାଇବାକୁ ଯୋଗ୍ୟ। ଏ କଥାକୁ କେହି ଅସ୍ବୀକାର କରିପାରିବେ ନାହିଁ। ଅଥଚ ସେଥିପାଇଁ ତାଙ୍କୁ ଏପର୍ଯ୍ୟନ୍ତ ମନୋନୀତ କରାଯାଇ ନାହିଁ। ଭାଷାଭିତ୍ତିରେ ଯେଉଁ ରାଜ୍ୟ ସବୁ ଗଠନ ହୋଇଛି ତାହାର ଆଦ୍ୟ ସୂତ୍ରଧର ହେଉଛନ୍ତି ସେ। ତାଙ୍କରି ପ୍ରଚେଷ୍ଟାରେ ଓଡ଼ିଶା ଆଜି ଭାରତର ପ୍ରଥମ ଭାଷାଭିତ୍ତିକ ରାଜ୍ୟର ପରିଚୟ ପାଇଛି। ସର୍ବଭାରତୀୟ କ୍ଷେତ୍ରରେ ତାଙ୍କର ମହତ କାର୍ଯ୍ୟାବଳୀ ବିଚାରରେ ସେ ଯଥାର୍ଥରେ ଭାରତର ଗୌରବ।
ଉତ୍କଳ ଗୌରବ ମଧୁସୂଦନ ସାଂସ୍କୃତିକ ପରିଷଦ ପକ୍ଷରୁ ଆଜି ଭାରତୀୟ ବିଦ୍ୟାଭବନରେ ଅନୁଷ୍ଠିତ ରାଜ୍ୟସ୍ତରୀୟ ସମ୍ମିଳନୀରେ ଏଭଳି ମତପ୍ରକାଶ ପାଇଛି। ଏଥିସହ ମଧୁବାବୁଙ୍କୁ ଭାରତରତ୍ନ ପ୍ରଦାନ ଦାବି ଦିଲ୍ଲୀରେ ପହଞ୍ଚାଇବାକୁ ଏକ ଷ୍ଟିୟରିଂ କମିଟି ଗଠନ କରାଯାଇଛି। ଏଥିରେ ‘ସମ୍ବାଦ’ ସମ୍ପାଦକ ତଥା ବିଧାୟକ ସୌମ୍ୟରଞ୍ଜନ ପଟ୍ଟନାୟକ, ପୂର୍ବତନ ସାଂସଦ ଐର ଖାରବେଳ ସ୍ବାଇଁ, ସାହିତ୍ୟିକ ହରପ୍ରସାଦ ଦାସ ଓ ଦାଶ ବେନହୁର, ପୂଜ୍ୟପୂଜା ସଂସ୍କୃତି ସୁରକ୍ଷା ଅଭିଯାନର ଅଧ୍ୟକ୍ଷ ପ୍ରଦ୍ୟୁମ୍ନ ଶତପଥୀ, ଆଇନଜୀବୀ ଧରଣୀଧର ନାୟକ, ଉତ୍କଳ ସମ୍ମିଳନୀର ଦିଲ୍ଲୀପ ଦାଶଶର୍ମା, ପରିଷଦର ସମ୍ପାଦକ ପୁରଷୋତ୍ତମ ବିଶ୍ବାଳ ସଦସ୍ୟ ରହିଛନ୍ତି। ୨୦୨୩ ଜାନୁଆରି ୨୬ ପୂର୍ବରୁ ଏକ କୋଟି ଓଡ଼ିଆଙ୍କ ଦସ୍ତଖତ ସମ୍ବଳିତ ଦସ୍ତାବିଜ୍ କେନ୍ଦ୍ର ସରକାରଙ୍କ ନିକଟରେ ପହଞ୍ଚାଇବାକୁ ସମ୍ମିଳନୀରେ ନିଷ୍ପତ୍ତି ନିଆଯାଇଛି।
Comments are closed.